حلم الفقير
عجبى على ناس فى العشوش
مساكين وغلابه
وناس تانيين ...
زى الوحوش فى الغابه
حلم الفقير تستره شجره
وتضلله سحابه
وناس بتنهش فى لحمه
وكأنها ديابه
الدنيا قاسيه عليه
ماهى دنيا كدابه
بنى كوخ بالطين
ورسم ع الأرض بوابه
وزرع قصاد الكوخ
شجره ولبلابه
ونام تحتها يحلم .....
بنص رغيف وكبابه
حتى فى أحلامه حزين
وأحلامه نصابه
هجم عليه فى الحلم ناس
كتيررررر وعصابه
سرقوا منه لقمته
ده حظ ولا خيابه؟
الدنيا حالها كده
مش ورقه وقلم وكتابه
عجبى على ناس فى العشوش
مساكين وغلابه
ليست هناك تعليقات :
إرسال تعليق